«Yon sèl lang ofisyèl» genyen ladan l senk chapit diferan men ki marande ak yon sèl lide : dechouke mantalite nou. Dechouke mantalite n, lè nou sispann itilize lang Fransè yo kòm lang ofisyèl peyi a, lè nou sèvi ak li tankou zouti pou nou imilye Ayisyen parèy nou, ak lè nou sispann bay timoun yo senbòl nan lekòl yo epi mande yo eksprime yo chak lè yo itilize lang manman yo. « Lang sa a, nou fè li lonè lakay. Epi nou renmen sèvi ak li anpil anpil pou toufounen pwòp sè ak frè nou, alòske Konstitisyon peyi a di nou sèl lang ki simante nou se kreyòl la », se sa M. Tardieu eksplike nan entwodiksyon liv li a, ki gen pou tit ‘’Yon twofe pou esklizyon.

Pou byen chita refleksyon l lan, Gérard-Marie Tardieu retranskri nan premye chapit la ki titre ‘’Istwa Gérard-Marie Tardieu, defansè lang kreyòl la’’ yon entèvyou li te fè nan jounal Le Nouvelliste, nan dat ki te 21 jiyè 2015. Nan bat bouch sa a-connaître nos académiciens-, ekriven an fè konprann kijan lang ayisyen an charye sa nou reprezante kòm pèp, tout sa ki idantifye nou tankou yon Ayisyen natifnatal. « Lè m te piti, lakay mwen kouwè lekòl, se franse granmoun yo te vle pou mwen pale. Sa ki pi rèd, lekòl menm te gen pinisyon lè w pale kreyòl, te gen senbòl, yon eritaj pè ak mè ki soti lòtbò dlo te vin ban nou kenbe pou nou divòse ak kilti nou. Dayè se te yon epòk kote ‘’rejete’’ t ap taye banda.»