Gen yon seri pyès teyat ki rakonte yon istwa. Gen lòt ki itilize istwa yo pou fouye anndan fondalnatal sosyete a. SWEETNESS, adaptasyon ak miz an sèn Lesly Maxi, antre nan dezyèm kategori sa a. Se yon monològ ki pa sèlman rakonte istwa yon manman ak pitit fi li; li touche yon pwen ki pi fon, ki gen gwo doulè, kote koulè po vin tounen yon mezirèt pou mezire valè moun, yon zouti dominasyon, yon eritaj sosyal, epi pafwa yon zam yon moun itilize kont pwòp tèt pa li.

Pyès sa a antre nan pwogramasyon 23yèm Festival Quatre Chemins 2026 la, ki pral dewoule soti 25 novanm rive 7 desanm sou tèm « L’art est vivant ». Yon chwa ki pa fèt san rezon, paske depi kreyasyon li, festival la toujou itilize teyat pou louvri deba sou gwo kesyon sosyete a pè poze.